اشمعنى اسلامية؟!

حبة أسئلة

مع بداية رمضان كل الناس بتحاول تقرب لربنا ... وأحيانا يظهر في بعض برامج التليفزيون كلام انشائي عن ان مصر دولة إسلامية وإنها حصن الإسلام وكلام مكرر من هذا القبيل... وجايز في السنين الأخيرة يكون مر عليك حوار زي ده قبل كده:

الأول: يعني إيه يافلان إن مصر تبقى إسلامية؟

الثاني: أعتقد يعني يحكمنا رئيس إسلامي

الأول: يعني إيه رئيس إسلامي؟

الثاني: يعني رئيس مسلم يخلي مصر إسلامية

الأول: أيوه يعني اللي هو إزاي مصر إسلامية؟

ويرجع الحوار لنقطة الصفر ويستمر في دائرة مفرغة.

أنا كمان كنت بسأل نفسي أسئلة كتير زي: هو إزاي تبقى مصر إسلامية؟ ... طب هو ليه لازم تبقى إسلامية أصلا؟ ... إشمعنى إسلامية تحديداً مش حاجة تانية؟! ... طيب هل الإسلام غاية في حد ذاته ولا وسيلة لحاجة تانية؟ ... يعني إحنا مسلمين علشان لازم نبقى مسلمين ولا مسلمين علشان نوصل لحاجة من ورا إن إحنا مسلمين؟

الإجابة اللي عندي إن الإسلام هو وسيلة وليس غاية في حد ذاته ... وده مقسوم شقين: على مستوى الفرد ومستوى المجتمع:

على مستوى الفرد حضرتك عايز طبعا ان ربنا يرضى عنك في الدنيا والأخرة ويدخلك الجنة ... ولو حضرتك مسلم فبالتالي الإسلام بالنسبة لك هو وسيلة الوصول لرضا ربنا.

على مستوى المجتمع: المجتمع عايز يبقى مجتمع ناجح وراقي ومحترم وعلشان يوصل لكده فالاعتقاد السائد انه لازم يكون مجتمع إسلامي!!! هنا في مشكلة، أصل إحنا مسلمين، ومع ذلك لو حضرتك سألت أي حد عن رأيه في المجتمع وأحوال المجتمع فعادة هتسمع إجابة سلبية ... بس إحنا مسلمين !!! طب إزاي؟ ... هل مثلا نتخلى عن فكرة المجتمع الإسلامي ونقلد أوروبا يمكن نبقى كويسين؟

الإجابة ببساطة إن حضرتك ممكن تكون فرضت فرضية غلط وصدقتها ... هو مين قال أصلا إن إحنا في مجتمع إسلامي؟ ... ومش بس كده، مين اللي قال إن أوروبا مش مجتمع إسلامي؟ ... الحقيقة لو حضرتك عايز تعرف المجتمع الإسلامي اتفضل زور دولة إسلامية ... مش من الدول اللي في بالك ... لكن ممكن تزور الدنمارك مثلا أو ألمانيا أو السويد أو دولة من المجموعة دي.

اسمح لي أعرفك عن المجتمع الإسلامي هناك ونقارنه بالمجتمع الجاهلي اللي هنا:

المجتمع الإسلامي (هناك)

خلينا الأول نقسم تعاليم الإسلام لنوعين: تعاليم للفرد بينه وبين ربنا زي الصلاة والصوم والحج وقراءة القرآن ... وتعاليم بين أفراد المجتمع وبعض.

هناك عملوا إيه؟

شايف التعاليم بتاعة الفرد؟ .. لأ دي الصراحة كبروا دماغهم منها وسموها حرية شخصية ... حضرتك حر تروح الجامع أو الكنيسة أو متروحش .. تقرا المصحف أو الإنجيل أو متقراش ... تشرب خمور أو متشربش ... البنات تلبس قصير أو طويل ... إلخ. كل ده حرية شخصية.

أما بالنسبة للمجتمع فالوضع مختلف ... خلينا نراجع أمثلة من القيم الإسلامية:

- العدل: القانون مطبق على الجميع ... المواطن والسائح ... الغني والفقير.

- نزاهة: الدنمارك أقل دول العالم فسادا (تقييم 2015) ... السويد نمرة 3 .. ألمانيا تحت شوية نمرة 10 ... (مصر 88).

- العمل: سكان الدنمارك هم حوالي 6% من سكان مصر فقط ... لكن الناتج المحلي يزيد عن مصر بحوالي 30%.

- الأخلاق: مثال واحد يكفي .. ممكن تلاحظ الطابور هناك ... الطابور قد يطول وقد يتلوى بأشكال ثعبانية معقدة لكن محدش بيحاول يحتال عالطابور ... كل واحد ملتزم بدوره في الطابور.

- الإتحاد: حضرتك ممكن تبقى ساكن في هولندا وتنزل تشتري البقالة من الراجل اللي عالناصية في بلجيكا .. عادي جدا ... وحدة.

- النظافة: الشعوب بتحاول تحافظ على نظافة المكان دايما ... حتى الحارات الضيقة بتكون نضيفة.

- ممكن حضرتك تكمل وتعد قيم إسلامية كتير: العـلم .. الأمانة .. الجمال .. الحفاظ على البيئة .. حقوق الإنسان .. حقوق الحيوان ... إلخ

باختصار كده، المجتمع إسلامي بس هو مبيقولش ... يمكن علشان الحسد.

حارة ضيقة ، ولكنها نظيفة ... الصورة من اليونان

CORRUPTION PERCEPTIONS INDEX 2015

ومن اللطيف أن هناك فعلا من قام بدراسة تطبيق الدول المختلفة للتعاليم الإسلامية وخاصة الجانب الاقتصادي، وقاموا باختيار 12 نقطة كمعايير لتصنيف الدول تغطي الاقتصاد ذاته والبيئة العامة المحيطة به مثل مراعاة حقوق العمال والأمانة في التعاملات ومستوى الفساد ومحاربة الفقر.

وكانت النتيجة ان الدولة الإسلامية الأولى كانت أيرلندا تليها الدنمارك وجاءت اليابان في المركز 21 وألمانيا 26 ... وحتى إسرائيل احتلت المركز27... (مصر 128).

اللينك الخاص بالدراسة

المجتمع الجاهلي (إحنا يعني):

بالنسبة لتعاليم الفرد؟ .. مية مية .. بنصلي وبنصوم ونقرا القرأن ونسبة الحجاب في ارتفاع والمساجد بتتملي في رمضان وفيه ناس بتطلع عمرة او حج كل سنة.

بالنسبة للمجتمع:

أمثلة بسيطة: حاول تلاحظ سلوكنا في اشارة مرور مش متراقبة ... نسب السير عكس الاتجاه ... سلوكنا في طابور المترو مثلا أو أي طابور عموما ... سلوكنا في الاوبن بوفيه ... الاسراف في الاكل في رمضان ... حالة حديقة عامة بعد ما زورناها يوم شم النسيم ... حالة شط اسكندرية في نهاية موسم الصيف ... الحالة تحت أي كوبري طول السنة ... كم الرشاوي علشان تحاول ترخص عربيتك في المرور ... المضايقات اللي بتواجه البنات في الطريق العام وخصوصا يوم العيد بعد رمضان على طول ... الالفاظ في حوارات الناس مع بعض ... إلخ

باختصار حاول تقارن نفس القيم الإسلامية السابقة الذكر عندنا (العدل، النزاهة، العمل، الأخلاق، الاتحاد، النظافة، العـلم، الأمانة، الجمال، الحفاظ على البيئة، حقوق الإنسان، حقوق الحيوان ... إلخ

الحقيقة إن مفيش مجتمع إسلامي ... غاية ما هنالك أن المجتمع يحث الافراد على القيام بعباداتهم وتنفيذ تعاليم الدين كأفراد وبس ... أما القيم الإسلامية في المجتمع فهي مفقودة ... بالتأكيد هي غير معدومة ولكنها قد تتواجد بنسب ضئيلة للغاية وغالبا كحالات فردية استثنائية نفرح اذا صادفناها.

أو بعبارة أخرى أن الوضع معكوس، فهناك الاهتمام الاكبر متجه للمجتمع أما هنا فالاهتمام الاكبر منصب على مظاهر التدين الفردية فقط.

مش فلوس

ربما يرى البعض أن المقارنة ظالمة بين مجتمعنا وبين مجتمعات غنية ... الحقيقة أن السلوكيات المتحضرة لا علاقة لها بالثروة أو المال، النوبة في مصر ليست غنية ولكنها أكثر رقيا وجمالا ونظافة من العاصمة ... دول أخرى أكثر فقرا من مصر ولكنهم أكثر احتراما للمرور دون الحاجة لرقابة قوية.

التحضر ليس بالضرور نتيجة للثروة والغنى، ولكن العكس قد يكون صحيحا ... فهم أغنياء لأنهم متحضرون وليس متحضرون لأنهم أغنياء.

النوبة

الخلاصة

بالتأكيد الكل يذكر المقولة الشهيرة للإمام محمد عبده "في الغرب وجدتُ الإسلام ، ولم أجد المُسلمين ، وفي البلاد الإسلامية وجدتُ المُسلمين ولم أجد الإسلام" ... ده بصراحة اختصار كل اللي حضرتك قريته ... ده حالنا، واحنا الحقيقة - مضحكش عليك - مش دولة إسلامية.

لو انت سألتني عايز مصر تبقى إسلامية؟ .. هقولك طبعا ... نفسي مصر تبقى إسلامية بجد، زي الدنمارك واليابان وألمانيا والسويد.

#إسلام