وكالة حاف

الحوار التالي تم في وكالة أبحاث الفضاء المصرية والتي أنشئت في أوائل القرن لتضع مصر على أعتاب الفضاء... وكانت بداية الوكالة فيها بعض من الجدل، ولم يكن الجدل حول الميزانية أو استراتيجية العمل أو الهيكل التنظيمي للوكالة، كل تلك الأمور لم تكن مشكلة، والحقيقة أنه من الأصل لم تتم مناقشتها على الاطلاق... كان الجدل منصبا حول اسم الوكالة إلى أن اجتمع سيادة الوزير وسيادة المحافظ واتفقا على تسميتها "وكالة مبارك لأبحاث الفضاء"، ووافق الجميع بالإجماع... وتم تجهيز المكان عبارة عن مبنى فخم كتب عليه اسم الوكالة على لافتة نحاسية كبيرة وبالداخل كانت هناك مكاتب عديدة للعاملين ومكتب كبير للمدير يحتوي على تكييف وفرش جلد وتليفزيون ملون... وفي يوم الافتتاح تم الترويج الإعلامي للوكالة مع سيل من الأغاني الوطنية ولقاءات تليفزيونية تحكي عن استشراق المستقبل والدور الريادي العلمي لمصر في السنوات القادمة.

انتهت الاحتفالات وعاد الناس لحياتهم الطبيعية ولم يعرف أحد شيئا عن الوكالة الجديدة ... لكنه حدث بعد سنوات أن ثار الجدل من جديد حول اسم الوكالة واجتمع الوزير والمحافظ من جديد وأطلقوا عليها اسم "وكالة الهدى والنور الفضائية" وأعادوا طلاء واجهات المبنى واحتفى الاعلام بالوكالة من جديد، ثم تغير الاسم من جديد الى "وكالة تحيا مصر الفضائية" ... ثم نتيجة ضغوط عديدة من بعض الأقلام الصحفية وبعض برامج السخرية العالمية حدث أن تغير الاسم من جديد واختار الوزير والمحافظ اسما مصريا خالصا، فاختاروا "حورس" وأصبح الاسم الكامل "وكالة حورس لأبحاث الفضاء" ... والاسم المختصر وكالة "حاف" (زي وكالة "ناسا" كده) وأعادوا طلاء واجهات المبنى،.

دكتور "سحاب" هو أحد شباب العاملين في "حاف"، كان شابا طموحا حصل على الدكتوراه من الخارج وكان مطلوبا للعمل في ناسا (للعمل في ناسا بجد مش كده وكده) ... ولكنه بعد افتتاح الوكالة المصرية دفعته الوطنية أن يرفض "ناسا" ويلتحق بـ "حاف".

في أحد الأيام ذهب دكتور "سحاب" الى دكتور "رزين" (مدير عام الوكالة).

سحاب: صباح الخير يادكتور رزين ... عندي تصور لمشروع فضائي جديد.

رزين: صباح الخير يادكتور ... أنا اللي كنت عاوزك ... كويس إنك جيت، انا كنت هبعتلك.

سحاب: خير؟

رزين: أنا قدامي كشوف الحضور والانصراف بتاعة الشهر اللي فات، واضح قدامي إنك بتتأخر عن مواعيد الحضور وفي كذا يوم، ممكن تفسر لي السبب؟

سحاب: يادكتور ده طبيعي ... أنا بسهر كل يوم علشان أدرس المشروع جديد، وحضرتك عارف ان المكان بالنهار مكدس بالموظفين والمكاتب ... وعشرات الطلبة من كليات كتير بيحضروا بالنهار لأن كل دكتور زميل بيشرف على رسائل طلبة كتير في جامعات مختلفة علشان يقبض بدل الاشراف رغم إن الرسائل مكررة ومقتبسة ومكدسة في مكتبة الوكالة ... طبيعي يا فندم إني اشتغل أخر النهار في الوقت الهادي علشان أخلص شغلي بسرعة.

رزين: دي كلها أعذار ... يادكتور انت عارف ان المكان هنا ليه نظام، وطول الوقت احنا محافظين على النظام ... المكان هنا له مواعيد محددة، أنا هتجاوز المرة دي لكن لو اتكرر التأخير فقسم شئون الموظفين هيخصم منك الحوافز والبدلات... المهم انت كنت عاوزني في ايه؟ .... ايه المشروع الفضائي الجديد؟

سحاب: المشروع عبارة عن مركبة فضائية بكاميرات متطورة نطلقها في رحلة الى حدود المجموعة الشمسية وتصوير كوكب بلوتو ... ستكون أول رحلة في العالم الى هناك.

رزين: بلوتو؟ ... ده بعيد أوي يادكتور ... الرحلة دي هتاخد وقت طويل جدا.

سحاب: حوالي تسع سنين للرحلة يا فندم بالإضافة لوقت التجهيز قبل الرحلة.

رزين: 9 سنيييين؟ مفيش كلام من ده ... يا دكتور أنا فترة رياستي للوكالة هتخلص كمان سنتين ولو اتجددت هتبقى أربع سنين كمان، عايزني أكتب أيه في تقريري السنوي للوزارة؟ ... أكتب كل سنة أصل المكوك لسه موصلش؟ ... وبعد ما أتعب أقوم أمشي أنا من الوكالة تقوم المركب توصل في عهد المدير الجديد وياخد هو النجاح عالجاهز؟ ... ويطلع هو بقى في التليفزيون مع صور بلوتو ... ده مش بعيد يبقى وزير بعد كده... أتعب أنا وياخد هو النجاح عالجاهز .... لا يادكتور، شوفلنا مشروع كده في السريع يخلص في سنتين.

سحاب: المشروعات الفضائية كلها يافندم محتاجة وقت طويل... وبعدين يافندم ده هيبقى أول مشروع فضائي في وكالة "حاف" ... من ساعة ما جيت الوكالة من سنين كتيره مفيش أي مشروع فضائي ... أعتقد لازم نبدأ.

رزين: احنا لسه بندرس خطط الوكالة ... وبعدين مشروع زي ده محتاج خبرات علمية وميزانية وكمان مكان واسع لمنصة الاطلاق واحنا معندناش أي حاجة من دي.

سحاب: لأ يافندم، الخبرات العلمية موجودة ... أنا وزمايلي الباحثين عندنا الخبرات الكافية على الأقل للبداية ... أما عن التمويل ففي وكالات فضائية ومراكز بحثية مختلفة ممكن تشترك معانا ... والمكان مش مشكلة يافندم، احنا ممكن نبدأ في تجهيز المكان اللي هينفعنا بعد كده في المشروعات المستقبلة، وممكن كمان نستغل منصات إطلاق في دول أخرى. أنا درست المشروع يافندم وعندنا حلول لكل العقبات دي.

رزين: جبت الموافقات الأمنية ؟ ... تجهيز المكان عايز موافقات أمنية ، وموافقات من الإسكان والتخطيط والبيئة... الموضوع مش سهل والدنيا مش فوضى يادكتور ... فيه نظام.

سحاب: .... (صمت)

رزين: بص ... الموضوع ده مش هيمشي ... شوفلنا حاجة كده في سنتين، رحلة كده للقمر أو قمرين صناعي ... حاجة كده سريعة وتعملنا بروباجندا... وبعدين فيه حاجة تانية يادكتور ... أمين المخازن بيقول انك سحبت ورق كمبيوتر كتير من المخزن، وانت عارف ده عهده... ياريت وانت خارج تعدي عالمخزن تمضي عالعهده وتبقى تكتب تقرير عن الخامات اللي اشتغلت بيها علشان الجرد ... انت عارف يادكتور ...هنا فيه نظام.

تمت

اليوم وبعد مرور سنوات: دكتور "سحاب" التحق بالعمل في ناسا ... وكالة "حاف" مازالت تدرس خطط العمل، وتعيد طلاء واجهات المبنى.

#وكالة #فضاء #الأرض #بلوتو #مكوك #علم #بحث